紀律一向都麻麻嘅巴塞隆拿翼鋒奧士文尼迪比利，上周六晚對愛斯賓奴入咗一球，仲畀隊長美斯大讚佢，諗住佢會開始乖乖地。點知呢位遲到慣犯喺西班牙時間周日早上巴塞開操嘅時候又遲到兩粒鐘，究竟又因咩事先？

今日西班牙每日體育報嘅網頁版就大字標題話「迪比利訓練遲到兩個鐘」，話說巴塞就喺周日朝早11點開操，點知迪比利佢就晏晝12點59分先喺訓練場地出現。報道指，迪比利到埗之後就喺更衣室同大家道歉，佢就話自己因為瞓過龍所以先會遲到。

不過今次就唔係呢位21歲嘅法國翼鋒第一次訓練遲到，上個月巴塞一次操練，呢位哥仔都係遲咗個半鐘先蒲頭，佢就話自己個日有啲唔舒服所以先會遲到，而事後官方都宣稱佢因為腸胃炎先遲到。上次球會就無處罰佢，但教練華維迪就雪咗佢一場，唔知今次會唔會加重刑罰？

--------------------<br />新球季，新陣容！利物浦 FC 18-19季球星進駐《BFB》！立即帶領紅軍，踏上登頂之路！  http://bit.ly/2oQObi1  <br />--------------------<br />《體蘋果》陪你睇波講波<br /> https://www.fb.com/appledailysports 

【慣犯】迪比利訓練又遲兩個鐘 今次咩原因先？

【慣犯】迪比利訓練又遲兩個鐘今次咩原因先？