冇見一排嘅韓片《我的忐忑人生》男星姜棟元，今日以一身黑衫黑褲打扮喺首爾出席新片《黑司祭們》記者會，同場仲有影帝拍檔金允錫。

不過記者會一開波就充滿「火藥味」，金允錫望下姜棟元個鞋踭，然後笑笑口咁話：「我要快啲坐低喇，你（姜棟元）本身已經身高1.86米，仲要着高多8厘米（約3吋），變成1.94米，你嘅造型設計師一定好憎我！」全場即刻爆笑，之後佢仲要踢爆姜棟元酒量好。

雖然姜棟元明知道前輩搞氣氛，但都一臉尷尬，唯有影合照時識做地彎低少少，曲一曲腳就番金允錫嘅高度。《黑司祭們》係姜棟元同金允錫繼電影《田禹治》之後再次合作，故事講述兩位司祭為了拯救面臨危險嘅少女而與神秘事件對抗。