兩個幾月前退出民協另組壓力團體嘅馮檢基，壓力團體尚未成型，就另有搞作，佢早表明剛獲工黨通過推薦代表出選嘅劉小麗，若果未能入閘參加立法會九龍西補選，自己就會去馬參選。自言勝算高嘅阿基唔知係咪政綱都有埋，率先提出要關注年青政治犯，強調：「我係太平紳士嚟㗎，可以探佢哋」，仲話旗下社企可以作為呢班後生仔日後重投社會嘅踏板。

話說基哥噚晚接受網名「無敵神駒」嘅本土派人士仇思達邀請，喺對方網台大談九西補選，覺得呢個組合好新穎？如果知道仇思達經常鬧爆劉小麗，相信唔會意外，事實上阿基喺節目上再鬧爆劉小麗「欽點」工黨李卓人做Plan B係反民主，其實呢啲論點，阿基都重複講過，比較新啲嘅係，阿基提到關注年青政治犯問題，批評前特首梁振英故意引用暴動罪控告佢哋，為佢哋無端端坐多幾年監不值，「好可惜，佢哋係愛錫香港、坐咁耐，將來點呢？」

本身係太平紳士嘅阿基話，有機會想去探望呢啲在囚後生仔，仲請主持幫幫忙聯絡，又話「驚啲人歧視佢哋（年青政治犯） 」，所以希望喺當中搵啲投入、愛香港嘅人，加入佢搞嘅社企同壓力團體，幫佢哋日後謀生咁話，「我搞過4個社企，最高峰請過百人㗎！」其實政治犯議題今年年初初選時好hit，但阿基就少談，唔知係咪初選落敗有所反思、調整呢？

參選難免令民主派票源分散，講過相信選民智慧嘅阿基話「最後我都係信選民」，但佢當然都信自己，覺得「工作時間、長度、不同地區服務，以至知名度」，佢嘅能力「從呢啲因素應該夠（票）」，不過佢亦都話劉小麗若然被DQ又支持工黨李卓人，咁李卓人自不然會有「同情分」，自言自己只喺一個「獨立民主派」，所以都會有變數㗎。

立會補選新聞，《蘋果》一網睇晒
http://bit.ly/appledaily1125