奧尼爾吐真情/亂噏

蘋果日報 2002/05/23 00:00


「巨無霸」奧尼爾要同李維士喺擂台上一較高下?要同積遜教練一齊退休?美國《Maxim》雜誌嘅記者甘冒生命危險,問咗奧尼爾一連串每個球迷都好想知道,但係又唔夠膽喺「巨無霸」面前問嘅尖銳又抵死問題,保證各位讀後捧腹大笑。
問:記者 奧:奧尼爾
問:你打咗咁耐波射罰球重係連三歲細路都不如,你重會唔會奢望罰球有改善?
奧:我𠵱家射罰球五五波,一球入一球唔入,我已經滿足喇!不過我喺發火時會射得更準。

與拜恩「手足情深」
問:高比仔未嚟之前,你一個冠軍都攞唔到,係唔係就因為咁你兩個成日狗咬狗骨?
奧:我哋都尊重對方,好似兄弟咁。不過平時我唔會成日call佢,佢亦都唔會call我。我知道佢起咗間大屋,如果佢請晒我哋班隊友去佢屋企開P嘅話,我做柴可夫司機又點話。
問:聽講你同積遜又有牙齒印?
奧:佢係個好出色嘅教練。我記得有一次叫暫停時,積遜同我哋教路,點知座上客占基利喺佢後面扮鬼扮馬;搞到我笑到流眼淚,積遜都只係一笑了之。所以如果佢喺聽日劈炮唔撈嘅話,我喺後日就跟佢一齊退休。

最唔順眼莫寧
問:你最唔順超邊個?最想同邊個喺擂台上打番場拳發洩?
奧:我一向最想同莫寧打番場拳,但係𠵱家佢病到殘晒,贏咗都勝之不武。𠵱家我最想同李維士打番場,不過酬勞要一千萬(美元)。如果有人肯出一千萬酬勞,我願意同任何人喺擂台上一較高下。
問:聽講你最鍾意搞舞會,但係次次都搞到一鑊泡?
奧:咩嘢話?我出晒名係全城嘅舞會之王。我搞親嘅舞會所有明星都到齊,而且美女如雲。好似我搞嘅生日舞會咁,有成三千五百幾人嚟捧場,其中超過二千人係女性,我所指嘅係做模特兒同封面女郎嘅靚女。
奧尼爾威水史
–00及01年帶領湖人接連兩屆贏得NBA總冠軍
–99-00年球季獲傳媒選為最有價值球員
–9次入選東西岸明星隊
–3次入選NBA最佳陣容一隊
–2次成為常規賽得分王
–2次入選最佳防守二隊
–00年當選明星賽最有價值球員
–96年獲選為NBA50位最偉大球星之一
–協助美國贏取96年奧運男籃金牌及94年世界錦標賽冠軍
–92-93球季當選最佳新人