港股噚日玩大挾倉，小初有幾個炒家老友晨早跟風揸期指，小初見到朋友賺錢，當然替人高興，但有人歡喜有人愁，另外有個老友打電話畀小初，話在高位買咗海爾中建（1169），問小初點算好？
海爾中建早兩個月，在海爾大聲高呼有意注入資產後，由0.15元炒上0.30元樓上，現時在0.25元水平徘徊，小初覺得佢已經好有交代，但老友就唔捨得輸。
海爾中建原本街貨好乾，但受注資消息刺激，好多大陸資金追入，原本班大戶亦順勢推高，兼且成功出咗唔少貨。呢一年以來，炒二三線股能夠賺到大錢，海爾中建算係其中表表者。
海爾中建上月公布業績，蝕6688萬元。據聞班大戶借勢將股價質低收貨，與此同時，市場亦流傳大陸炒家同二撇雞講唔掂數，導致股價急挫。但有知情老友話，只要海爾注資古仔一日未完，隻股仍有炒作機會，叫小初個老友唔好咁快灰心。
慕容小初