張敬軒、陳茵媺、唐文龍同衞詩雅等等，今日到圓方出席美容產品頒獎禮活動。唐文龍近日同新咪神黃文意傳分手，佢解釋話：「無喺埋一齊，大家係好朋友。媒體好熱心又熱情嘅報道，畀咗不必要壓力我同Mandy（黃文意），對佢措辭唔係咁好，大家手下留情。」又直言兩人冇發展機會。

軒仔早前為6月演唱會拍攝海報，以火燒頭皮喻意自己係「火爆小甜甜」：「之前有套戲叫做《反轉腦朋友》(Inside out)，我覺得自己好似入邊嗰個阿燥，所以就做咗呢個造型。對上一次14年嘅演唱會，請咗譚玉瑛姐姐，當時都引起咗啲話題，所以希望今次可以有創意啲，好想萬二人一齊喺紅館燒嘢食，可能到時唔派pom pom棒派燒烤叉。」佢分享新年到賭城開騷，期間被熱情歌迷搣屁股：「嗰日我著皮褲，可能太迷人。」

陳茵媺知道鍾嘉欣再度懷孕，佢話：「恭喜晒，我都好掛住抱BB嘅感覺，但第4個，好驚，唔生啦。」佢話自己好享受生嘅過程：「雖然係好痛，但係可以同BB一齊奮鬥嘅感覺好好。生其實唔難，教先至最難，好彩佢哋嘅DNA比較乖，但係我哋想佢哋可以發展出獨立嘅性格，所以教育上都比較自由啲。」

精選娛聞，喺晒《娛果》
http://fb.com/appledailyent