國泰同埋電盈兩間大企業，先後都有大動作，搞到兩間公司嘅高層氹氹轉，繼國泰百億收購港龍之後，呢排就有楷楷賣仔，阿媽網通公開反對，加埋啲不明朗嘅政治因素，消息滿天飛，為咗有料繼續寫古仔，傳媒日日貼身招呼一眾消息人士，見到人就圍住嚟問；見唔到就實行Call爆機，迫到你覆為止。
相對於仲趕緊科場嘅國泰、電盈高層嚟講，曾經做過呢兩間大企業高層，家吓已經退下火線嘅張永霖，就輕鬆好多。
早幾日華華同張永霖傾偈，佢同華華講，唔理人家搞乜，家吓佢已經離開咗是非地，有時間就做吓義工，喺電台開吓咪，行博物館睇吓畫，買吓藝術品收藏，上個月仲放咗8日假去歐遊。「青樓名妓」上咗岸，唔使再睇人面色嘅生活，你話係咪好盞呢？

歐洲遊執筍貨

講電盈事件就一口SayNo，但一講到其他，張永霖就即刻生猛晒！
佢話，歐遊期間，專登去跳蚤市場尋寶，結果畀佢搵到兩幅1949年法國畫家嘅作品，成交價平到你唔信，幾多？500港元，張永霖以往買貨平極都要萬萬聲，今次幾百蚊買兩幅，仲要係正嘢，真係估唔到。