當年今日

上網學護膚 - 左丁山

蘋果日報 2003/05/25 00:00


左丁山三隻手指最近出現幾小粒肉仔,痕而不痛,唔似生瘡,於是用最古老方法,以白花油對付之。
公關靚女阿美食飯時,聞到陣白花油味,即刻問:「做乜搽白花油?」如實告之,阿美大笑:「你哋啲男人,唔識護膚之道;其實呢類痕瘡仔多數係最近洗水太多,對梘液敏感之故。男人亦多數喺屋企飯來張口,唔入廚房洗碗;唔戴手套用洗潔精洗碗碟,洗得多手指亦會生一粒粒嘅。𠵱家人人緊張沙士傳染,成日講勤洗手,不握手,冇特首,洗得多,咪會咁咯!」
講咁多嘢做乜,自己真係一日洗手二十次以上噃,有乜辦法先?阿美叫我洗手之後用吓護膚膏,盡量唔好用火酒噴手指,得閒就上網學習護膚之道。佢介紹左丁山上www.rthk.org.hk(香港電台網站)嘅最新課程——健美學堂——由專家李韡玲現身說法,傳授日日容光煥發嘅秘訣。
「健美學堂」有五大主題,其中之一就係「護膚篇」,內分十個環節,洗面方法、護膚基本法、幼滑皮膚必備方、不同性質皮膚護膚法、黑斑消除、四季皮膚保養、手腳護理、護髮行動等等。
其他四大主題就係「美容食療篇」、「美妙生活篇」、「KeepFit篇」、「心理健康篇」,多到一時之間睇唔晒,左丁山唔慌有時間、耐性睇足全套;正是無事不登三寶殿,既然手指生痕粒,上網睇睇李韡玲,學吓護膚之道先。