31歲江若琳今日嫁37歲「生煎包王子」蕭潤邦（Oscar)，正式成為蕭太，噚晚入住酒店準備，夜晚分別由長輩為一對新人進行上頭儀式，新郎今朝一早起身，準備接新娘。

一對新人都係2007年加入樂壇，所以兄弟姊妹團都搵埋當年同期朋友，由張繼聰、謝安琪、小肥同Hotcha等，組兄弟姊妹團，不過佢哋都有啲驚喜位，就係由小肥做伴娘，謝安琪做伴郎，由於JW有米男友Tarzan同江若琳老友鬼鬼，所以JW獲邀做姊妹，男友Tarzan就做兄弟。

今朝一班兄弟浩浩蕩蕩去接新娘，由小肥負責問兄弟團拎開門利是，之後姊妹團大玩兄弟團，要佢哋cosplay美少女戰士，播出江若琳首《Show You》嘅MV，要佢哋又唱又跳，扮相好騎呢，新郎Oscar戴上金色假髮，變身「月野兔」，而身穿「火野麗」戰衣嘅張繼聰表情就有啲尷尬。

精選娛聞，喺晒《娛果》
http://fb.com/appledailyent