煲呔組班安排不日揭盅，外界最睇唔透嘅係CS擺位，肥龍去向撲朔迷離，成為本地政圈最大謎團，政界人士近日其中一個最熱門話題，就係輸賭肥龍再坐一會定拜拜走人。八方聽聞有位財金超班猛人最勇，實牙實齒話肥龍做埋今個月就起身，佢做莊，其他人夠膽就落注，多多都受。

賭肥龍去留嘅盤都幾多花款㗎，除咗買佢7.1起身，亦有人賭佢留多陣，08年立法會改選後先功成身退，據稱由於呢個盤口幾熱門，輸贏最多一餐飯；較冷門嘅係買肥龍做多5年，不過相信唔係幾多人受。
至於夠膽做莊，話肥龍無心戀戰嘅猛人，同人講肥龍兩年前出山係為咗還人情債，做足兩年幾，「乜債都還晒，有凸㖭！」而且肥龍真係好享受退休生活，重返官場營營役役，冇晒人生樂趣，相信北京挽留都冇符。類似嘅原因，八方都聽過好多次，是耶非耶肥龍自己先知，不過暫時好似冇人夠膽同呢位財金猛人賭一鋪。有同肥龍交手多年人士話，肥龍諗嘅嘢，一般人唔會諗得到，佢要走，冇人有辦法留到佢，佢唔走，肯定係有比𠵱家做緊更重要嘅嘢要佢做，做乜？冇人開估。