有民間特首之稱嘅藝人劉德華相隔八年再喺紅館開show，只不過唱到第14場，華仔就因為「聲沙」而要腰斬個唱，今明兩日演唱會亦要取消，令唔少fans都非常失望。有人發現，特首林鄭月娥今年10月喺《施政報告》記者會上曾經為華仔抱不平，仲主動預祝佢12月演唱會成功，點知一講就變成「死亡之吻」，反而演唱會仲要腰斬收場，你話邪唔邪？

早前劉德華為團結香港基金宣傳短片擔任旁白，力撐明日大嶼填海而被網民圍攻。林鄭月娥今年10月喺《施政報告》記者會上就主動為華仔抱不平，覺得華仔拍片都係因為關心下一代發展，又話有人因為短片侮辱華仔係非常之唔公道。林鄭當時仲話：「對劉先生能敢於表達自己意見表示敬佩，預祝佢12月演唱會成功。」

林鄭嘅死亡之吻威力果然強大，華仔噚日唱到第14場就要腰斬個唱。相信華仔嘅粉絲同八方一樣，祈求呢一吻威力唔好太強，希望華仔休息埋呢一兩日就可以重踏紅館舞台啦。