日前港交所高層表示，未來兩三個月會再發表改革創業板的諮詢文件，提議提高創板的上市門檻，除市值要求大幅提高至1億元外，仲要計自由現金流有2000萬以上，即係話細公司要上創板掛牌，難度再提高。
事實上近年上創板掛牌嘅公司已經買少見少，去年只得6間咁大把，今年仲1間都未有。創板股喺科網股熱時期誕生，後因公司質素參差，創板股成交持續偏低，交易所於是展開救亡行動，逐步提高門檻及引入較高質素公司，配合陸續有公司轉主板，創板形象先至見有改善。假如呢次建議落實，相信有助進一步改善創板形象，創板股單計殼價都應提升唔少。

𠵱家創板股唔係等轉主板就係等賣殼轉型，實情卻不一定如此，因為要轉板，涉及嘅相關費用分分鐘要600至700萬元，而首次上市費可能只不過係千零萬，差唔多等於再搞多次上市，計埋主板維持上市費，唔多化算。同時，近年基金已唔介意買創板股，如細價股專家Galaxy就分別入股寶利福（8172）、變靚D（8079）等，同仁堂（8069）更有富達、鄧普頓等主流基金入股。
近排唔少創板股已見異動，如裕興科技（8005）玩拆細，鳳凰衛視（8002）忽然喪升等，要喺呢度尋寶，可以留意吓松景科技（8013），呢間生產電腦顯示卡嘅公司，截至3月底止9個月純利285萬（美元．下同），用番第3季純利約130萬元計，全年純利達415萬元，現價PE低至8倍，獲重估的話會有唔錯回報。