陳志雲同鄭欣宜今日喺紅磡出席《至Fit安全駕駛大行動打氣大會》，有腳傷嘅欣宜撐住拐杖到場，佢透露傷口埋得好好，仲需要做物理治療同戒口，佢話：「許廷鏗有日帶我去食意大利餐廳，點知肉丸混有牛肉，好好味，但好彩冇事。」

欣宜指自己16歲喺加拿大生活時已考獲車牌，肥姐沈殿霞當年有冇好擔心？欣宜話：「冇，但我反而好驚坐佢架車，佢開40(km)，揸得慢唔代表安全，有次後面架車『呠』佢，佢就話人『呠咩呠！』。」

對於亞視復活，有指陳志雲將會擔任全新一輯《百萬富翁》主持，佢事前透過公關表示唔接受訪問，不過經記者追問之下，陳志雲好口密咁話：「唔使心急，好快，等ATV自己講囉，等ATV講，我講係唔係都冇意思，所以等佢哋講好啲。」王喜話陪佢買西裝喎，佢笑住話：「佢成日都陪我買西裝㗎啦！」

提到喺方逸華嘅追思會上，陳志雲同李寶安有傾有講，似乎已經破冰，不過陳志雲指佢哋本身冇冰，何來破冰呢！講到方逸華頭號愛將陳偉文（Raymond）做接班人，出任邵氏董事總經理，佢話：「唔出奇，佢一向都有做開，佢有幫開方姐管理邵氏。」覺得佢係最適合嘅人選？佢話：「我唔會出奇，佢一向做開，方姐交帶得落，佢想佢（Raymond）繼續幫手，一定有佢原因。」

更多娛聞，喺晒《娛果》
http://fb.com/appledailyent