【掛住鴨血豬血糕】自爆約陳妍希「酗酒」 藤岡靛:不要欺負外國人啦!
陳妍希鴨血豬血糕藤岡靛山本美月不良笑花敘舊
曾先後到港台發展嘅日本男星藤岡靛,今日與女星山本美月、石井杏奈等訪台,出席「日本藝能祭典in台灣」活動。曾拍攝《不良笑花》等台劇而操得一口流利華語嘅藤岡靛,可能太耐冇「練習」,今日用中文回答台灣傳媒問題時顯得有啲緊張,仲不時發錯音,佢提到自己仲有同吳建豪、陳妍希等舊友聯絡,問到佢同陳妍希傾啲咩,佢個答案發音近以「酗酒」,令在場人士嚇咗一跳,後來佢澄清係「敘舊」,仲笑台灣記者:「你們不要欺負外國人啦!」
提到佢近日放時間喺日本發展,被問到台日兩地有咩唔同,藤岡靛話東京人比較冷靜,台灣人較熱情;日本人亦有較多規定,而台灣則較有彈性,佢坦言:「一開始回去感受到文化衝突。」藤岡靛亦指每轉一個國家工作,無論係價值觀定人生觀等等都要配合番當地而作出調整,對佢嚟講係一項挑戰。
而藤岡靛話自己最唔慣嘅係放飯,佢話喺日本都係食凍嘅便當,但台灣啲飯餸就熱辣辣,除咗夏天,佢都係想食熱飯餸。提到台灣最愛嘅食物,藤岡靛話最愛豬血糕同鴨血等呢啲一般外國人都唔敢食嘅嘢,佢仲話自己有推介俾日本當紅組合「嵐」,問佢點推介?藤岡靛話:「就這個很好吃啊,裏面只是血而已。」
藤岡靛此行只會逗留三日兩夜,下月再訪台出席高雄電影節。
精選娛聞,喺晒《娛果》
http://fb.com/appledailyent
藤岡靛與山本美月(右)等訪台參與公開活動。(台灣《蘋果日報》)
藤岡靛話仲有同啲台灣朋友聯絡。(台灣《蘋果日報》)
提到台灣美食,佢話最掛住豬血糕同鴨血。(台灣《蘋果日報》)
藤岡靛曾與楊丞琳及陳妍希等合演《不良笑花》。(資料圖片)