台灣導演鈕承澤執導新片《跑馬》其間，被爆性侵女工作人員，噚日鈕承澤去咗大安分局接受問訊（相關新聞︰ https://bit.ly/2L0sV4h ）。至於《跑馬》一片嘅男主角任賢齊，及台前幕後工作人員，都因為呢件事拍攝受到影響，噚日仲話劇組要解散。

劇組停工，最慘應該係男主角任賢齊（小齊），事關佢為咗呢部戲，原本靚仔有型嘅佢犧牲身形，今年年頭開始就增肥，由74kg增至100kg，足足肥咗26kg，計番超過50磅有多，如今劇組解散，部戲又唔知幾時會續拍，小齊分分鐘白肥一趟。其實小齊為咗呢部戲，年初開始喺3個月內增肥，1日最多食6餐，由型男變成有大肚腩嘅肥佬，亦因為增肥嘅緣故，小齊嘅身體搞到有三高，即係血糖、血壓同血脂高，真係犧牲大。

據了解《跑》片拍咗大約有3分2嘅戲份，小齊嘅戲份亦由最肥嘅肥佬造型，拍到戲中開始收身，而部戲本來拍到明年初就拍完，o依家導演因為性侵醜聞，搞到劇組要解散，部戲會唔會續拍都係未知數，最慘係小齊仲keep唔keep住呢個身形好？因為增肥後呢段時間，好多工作都未必適合而接唔到，而年尾大時大節嘅活動又接唔到，小齊今次認真犧牲大兼損失大。

據台灣《蘋果》報導，對於今次犧牲付出可能白費，小齊嘅助理代回應︰「我們先靜觀其變。」對於劇組解散則表示未有聽聞，而小齊會先休息。至於《跑》片女主角張榕容，其經理人亦回應表示︰「我們就是先休息，張榕容同時還有另外一個工作，就先專心在這個工作上面。」除咗男、女主角外，其實一班工作人員都好慘，部戲未拍完，又唔知會唔會續拍番，分分鐘會爛尾，連尾期都收唔到。

精選娛聞，喺晒《娛果》
http://fb.com/appledailyent