出年冇電視牌嘅亞視，噚日為《第二十七屆ATV2015亞洲小姐競選》開記招，幾個歷屆冠軍呂晶晶、張家瑩、馮雪冰同張軼珺，加埋好快約滿嘅藝人朱慧珊返大埔總台幫手宣傳，司儀係得罪亞視含淚認錯嘅秦壠維，亞視執行董事葉家寶同維維握手示好，仲有失蹤多年嘅馮雪冰就喊住感激葉家寶。

考慮再申請牌照

新財團未正式公佈，但係亞姐已經開始推，亞姐之父葉家寶喺記招話：「今年亞姐破天荒入圍會有100個，總決賽有72小時賽事，今年大搞有新意思，希望係新集團入主一個重頭新節目。」佢講到亞姐係全球關注，預計投資過千萬，已經搞緊內地招募。佢仲透露亞視未來會發展衞星電視同網絡電視，唔排除下年4月1號重新申請牌照。
1985年和平小姐朱慧珊力撐亞視到最後，珊姐話：「有聽過冇人買呢個台，但有人買呢個節目，唔擔心會最後爛尾。」張家瑩話已經開始幫亞視到東南亞宣傳，佢最希望今年亞姐有番個后冠，佢覺得呢個非常有象徵性，點解咁講？咪因為之前嗰啲係假嘅囉！