早前講過特首係份衰工嘅鬍鬚曾話，特首呢份工當然唔易做，至於有冇心選特首？佢話：「呢個係需要好詳細嘅考慮。」咁都啱嘅，太快表態，擅長搞黑材料嘅人會好快開工。
香港日日都離不開港獨兩個字，會唔會見到領導人講吓「反港獨」呢？佢話滙報香港情況係由特首梁振英負責，但如果有領導人或者中央官員向佢提問，佢非常樂意提供佢嘅睇法。
如果梁振英連任，佢係咪會繼續做落去？佢話未諗過，同埋呢條問題「好假設」。咁幾時會諗？鬍鬚曾話適當時候就會，乜嘢都會係考慮因素，包括立會選舉結果，不過又係嗰句，「𠵱家去到明年嚟講有非常長時間，我有好多機會可以作出深入嘅考慮。」