近期負面事件喺香港可以話接二連三咁發生，令唔少負面情緒同氣氛充斥社會。

咁啱關心妍（Jade）同王雙駿、陳詠謙跟一班音人組成團隊C-12推出新碟，裡面收錄歌曲都係講社會上仇怨憎恨、小三問題等題材，真係咁啱得咁橋，同近期港聞及娛樂新聞貼晒題，王雙駿話：「負面事件一直都有喺社會上發生，可能近排發生過份咗啲，其實社會一直都有唔正常唔公平嘅事發生。」

陳詠謙唔擔心隻碟喺呢個時候推出，會令負面氣氛更差，相反係一個反面作用，就好似有首歌《揀一個死法》嘅內容咁，若果要唔開心咁死，不如開心啲生活而死。

主唱嘅關心妍都覺得，今次隻碟嘅歌，有別於自己以往情歌K歌，會係一啲貼近社會嘅內容，佢話：「今次係實驗性質，若果反應好，C-12會繼續做，而我自己都會另外唱番關心妍式情歌K歌。」講到完成呢隻碟係咪同唱片公司約滿，佢澄清仲未約滿。