「歌神」影響潮流界

蘋果日報 2004/07/05 00:00


銅鑼灣街頭巧遇水貨大亨袁仁祥,口中竟哼起歌神許冠傑嘅歌,佢話:「其實我好鍾意睇演唱會,但祥嫂嫌飛貴唔畀睇,佢話睇兩場都夠買張機票去日本入貨,只准睇$100山頂位,最好係贈券喇!不過早陣子歌神場演唱會,佢格外開恩准我買$400飛,令人感動。今次歌神拉埋佢個大仔許懷恩上台,只見佢手臂有好勁紋身,聽人講原來佢喺加州大,同當地啲街頭時裝牌子搞手相熟,所以有紋身好平常,平時重喺網上發表吓潮流文化同有關音樂嘅文章,如果第時見佢同啲美國街牌合作有嘢搞,千祈唔使錯愕。」祥哥講嘢好少咁謙虛,可見歌神影響力。最近利時有啲Sales更將歌神嘅歌改成潮流版,特此分享:「難分真與假,猿面多欺詐,點解唔租瓊X?牆漏水Secure好差」(原曲《浪子心聲》),「佢哋呢班馬騮仔,一身水貨裏原系勁無謂,搵嗰些少到月底點夠使?確係認真濕滯」(原曲《半斤八両》),「佢老友叫阿凡檔嘢夠晒慘,Nike、NewBalance劑劑坐艇返,但願阿Cody清倉咪亂散,等返行貨,空悲歎」(原曲《尖沙嘴Susie》)。

主持人:大食Jack
八卦熱報:[email protected]
empty
■許懷恩同加州嗰邊啲流行街牌有良好關係,但從冇用來賣弄,實在好修養。