新城控股（1030）王振華被捕單嘢，官司絕非財經分析範圍，亦唔敢講堂堂幾百億董事長被補，係咪同政治有關，但今日就講吓內房股之中，佢盤數嘅風險系數，都相當驚人。

一）2018年底，該公司嘅淨資產負債率係204%，問題係呢204%絕未足夠反映其風險。佢嘅資產總額3,369億元（人民幣‧下同），淨資產191.52億元，喺資產組合不變之下，理論上當資產總值貶值6%，間公司就會變負資產。

二）睇Cash flow，2017年，向關連方、合營企業或聯營公司其他投資者撥款407.94億元，來自關聯方/合營企業或聯營公司其他投資者撥款為559.27億元，去到2018年，兩組關連交易數字升到去1,121.88億元同1,082.67億元，總和足足係年尾淨資產11.5倍！而年報對呢兩組數字披露嘅詳情不多，偏偏數字大到不僅影響公司存續，甚至係對金融市場構成影響嘅程度！

三）講緊2017年同2018年純利總和僅僅超過100億元，但作為內房股，2017年經營現金流出135.79億元，2018年經營現金流入僅3.21億元，現金流入完全唔夠畀利息同稅。

四）舊年純利67.61億元，融資成本淨額7.4億元，但係資本化利息達到51.54億元。如果用資本化利息抵扣純利，就只係賺16.07億元，派末期息17.6億都派凸晒。呢舊51億嘅資本化利息，未來係要還的，如果賣樓賣慢少少，或者利潤率下降少少，都大件事。

五）現金達476.55億元，係淨資產2.5倍，但喺呢類高負債民企嚟講，現金多反而令小弟不安。

結論係，新城控股盤數係絕不容許有水份存在，只要資產總值被輕微高估，間公司已經係負資產。偏偏如果當佢盤數係冇水份，又隨時去到不能合理運作嘅狀態。董事長被捕，股價大跌，押股、融資可能見困難，似唔似層層疊抽到無得再抽咁？自己諗。

晉佳

https://www.facebook.com/advanceguy1