生化科技，之前同未來增長好快相信大家都信。不過唔好話炒，大家應該睇都唔睇。淨係見到啲產品名一個字十幾個英文字母都即跪，孫柏文近月都求科大專才教導多次先明。

港散戶唔識，唔等於其他人唔識。喺深圳七月先上市，話係「生化科技騰訊」嘅華大基因，兩月升12倍。而港上市嘅金斯瑞（1548）則被投行里昂選為八隻「倍升股」之一，之後升到70倍市盈率。

其實，早排帶起全行股價嘅兒科血癌藥Kymriah出台新聞，收錢模式可將生化科技諗成地產發展，有如起個IFC出來收租。高固定投資後，慢慢收錢。

叫大家一注獨贏嘅BBI生命科技（1035），用地產作比喻，就係賣地基樁柱、挖泥機等。金斯瑞營業額增幅冇BBI咁快，兩成對三成，營業額只多三倍，不過市值就大十倍。點解咁平？

首先，之前BBI市值不足十億，基金經理唔准買。仲有中期盈利只升百分之四，亦令佢成寶藏嘅原因。佢盈利升少過營業額，係因收購繼而增大銷售團隊及產能嘅成本，撇除的話，盈利增長快過金斯瑞。

我平時見呢啲理由都會唔信，不過從未見過，八億資產，億半「負債」中，一億係因客戶餓到預繳嘅款項！即啲sales死晒，都已三個月生意額喺手！要增大啦吓話？

最後，生化科技毛利好高，因要專門知識同可信先有人幫趁，你始終唔會使幾億做實驗研癌藥，用啲會令結果唔可信嘅器材。所以唔係王維基、黎智英等有日起身想做就可做。佢市盈率十幾倍，又已開始吸引基金入，貨乾到喊，大家識做了。

孫柏文

蘋果財經，關心你飯碗
http://fb.com/appledailyatm