【元旦檔期未安排好】有冇機會上台開金口? 古天樂:諗吓先啦
搜尋人氣大獎亞洲人氣演員獎開金口古天樂
「Yahoo搜尋人氣大獎2018」今晚喺尖沙嘴舉行頒獎禮,第一個獎項就頒發「亞洲人氣演員」俾古天樂,古仔獲獎後話:「今年係幾豐收嘅一年,攞埋呢個獎好開心。(咁你期唔期待之後嘅音樂獎?)哎我唔諗呢啲,都唔係自己做開嘅嘢,(但係啲網友好期待喎!)多謝!」問到古仔如果到時真係得獎,會唔會上台?佢話:「今年時間都好緊密,聖誕都冇假放,所以元旦就安排當中。(到時會唔會上台開金口?)諗吓先啦!」
提到好多歌手,例如容祖兒等人都話要將自己嗰票投俾古仔(新聞連結: https://bit.ly/2E6DuSF ),古仔就話:「多謝囉!」咁點報答對方?古仔話:「我都會同佢食飯嘅,到時就獻唱一曲畀佢聽啦。」咁係咪即係代表古仔平日都有練歌呢?古仔話:「都有去唱卡拉OK嘅,佢就唱得好好,我呢啲玩票性質,不過我唔係好唱自己啲歌,但係佢哋好鍾意點。」講到可能大家都好想聽古仔唱,點知古仔話:「撳伴唱咪得囉!」
精選娛聞,喺晒《娛果》
http://fb.com/appledailyent