今年犯太歲的生肖以鼠和馬為主，單在立法會數埋都十個八個。最簡單的化解方法，屬鼠的就佩戴屬虎的飾物，屬馬的就佩戴屬羊的飾物。不過，八方同佢哋傾過，佢哋多數都唔放在心上，繼續安安心心過新年。
最灑脫要算「鼠人」單仲偕，佢同太太都屬鼠，雙重沖犯，但佢一於少理，話唔會特別做啲嘢。至於屬馬的勞永樂，佢一聽話會犯太歲，就好八卦咁追問八方應如何化解，而當知道要買羊仔飾物佩戴化解時，重靈機一觸話如果香港有十二分之一人買嚟戴，將會是刺激經濟的好方法，故就算佢自己唔信都會買番個戴吓。
屬馬嘅何秀蘭就同八方感歎，話如果犯太歲係指多麻煩的話，自己年年都咁多嘢煩，唔爭在煩多啲。不過最正氣都係張文光，屬馬嘅佢好義正詞嚴咁同八方講，話自己係老師，絕對唔會導人迷信，自己亦想都未想過甚麼犯太歲、如何化解，只相信「命運在你手」。正如許長青所講，信則有，不信則無。
睇嚟立法會除咗阿董同班官外，都唔會有第二個太歲。


E-mail：[email protected]