二五鬧劇，愈演愈騎呢，連唐唐都宣布「咪搞」，罔顧媽咪感受，毅然話唔參加特首「選舉」。
梗係喇，壽爺澳門親切會見當撈，揸扒六秒黃金大欽點，初頭以為做穩兩屆十年，原來只得「試用」兩年！壽爺當日在澳門，眼尾都冇乜點「臘」唐唐，淨係顧住同當撈四目交投，咁唐唐又豈有咁大膽，想挑戰當撈，咁咪即是變咗反中抗壽，同胡溫新政對着幹？
加埋賭王何出晒聲，叫人唔好參選搞破壞！呢句說話，當然係射向只值八十八分嘅唐唐嘞！點解賭王對唐唐咁深仇大恨？唐唐就要問吓佢老死田少嘞！田少話要喺大嶼山起賭場，擺明同澳門爭客，唐唐竟然附和，話要「研究」，咁你話又點唔輪到當撈今次隻手遮天吖？
民主派又想參「選」，話要迫當撈提出「政綱」，則係純屬低B，正好予土共民建聯挑撥之機！陳鑑林代表民建聯話會集夠一百票提名李柱銘參「選」，不過提名唔等於到時會「選」佢，咁即是擺明搗亂，想推阿馬丁入去，等馬丁同當撈隻抽肉搏，成班土共就睇戲嘞！