女子組合Super Girls成員趙慧珊（Aka）今日喺上環舉行個人畫展「HER」，佢會捐出18幅畫作慈善義賣，收益撥捐香港婦女中心協會的「婦女緊急援助基金」，除SG隊友撐場，余香凝、廖子妤、單立文、伍允龍、翟威廉，甚至緋聞男友吳業坤等都到場。

坤哥甫到見到有傳媒，佢再行出畫廊，猛叫唔好影佢，坤哥話：「公司唔知我嚟。」但最後都肯大方合照，記者叫坤哥同Aka合照時，佢先拉翟威廉，但後來都肯同Aka合照，女方有點尷尬。

Aka喺酒會接受訪問，佢好開心咁話，畫展未正式開始，18幅畫已籌咗20萬，佢話：「噚日收到消息，好開心，希望真係可幫到有需要婦女，我籌備咗大半年，大約有10幅畫畫吓掉咗，3個月完成18幅。畫畫好執着，發現偏離主題就掉咗，今次主題同女性打氣。」Aka話有英國藝術團體邀佢去開展覽同交流，Aka話：「唔想去住，我唔係學院出身，只係半途出家，希望可以深造下先，唔想得十幾幅畫，以為好犀利，周圍去開畫展，我主要工作係唱歌跳舞。通宵畫畫，好大壓力，有唔舒服，我試過發夢得三個人嚟。」咁係咪有坤哥嚟？Aka笑話：「唔係，啲人唔識，不過佢買咗兩幅畫。」每幅畫作約10800元，兩幅合計21600元，Aka話：「多謝前輩朋友嚟支持。」

坤哥竟話：「原來我唔知買咗邊兩幅，作為朋友，支持香港藝人多元化，低調支持做善事。」佢否認係想低調拍拖，佢仲話見大家氣氛咁好，一齊影大合照。問到坤哥兩幅畫係咪擺睡房，佢話：「未諗，佢鍾意畀番佢。」記者笑言可以掛坤哥家，叫Aka得閒嚟參觀，佢話：「唔好，不如掛車度，車頭、車尾都冇所謂，掛喺車可以同佢做宣傳。」

更多娛聞，喺晒《娛果》
http://fb.com/appledailyent