韓國長壽6人男團神話嘅成員Minwoo及申彗星（Hyesung）噚晚襲港，今日輪流喺亞博館舉行粉絲見面會，晏畫先由Minwoo打頭陣，唱歌、大談近況，同粉絲見足兩小時。

不過未知係咪演唱會宣傳不足，令到銷情慘淡，入座率不足三成，而見面會原本晏晝3點開始，不過因安排入場問題，延遲到3點38分先開場。而身穿白色冷衫嘅Minwoo戴住黑超現身，唱住《Taxi》開場，粉絲立即高舉橙色汽球或螢光棒為偶像應援，Minwoo仲叫粉絲企起身。

Minwoo表示對上一次來港已經係2013年同神話隊友嚟開騷：「真係好耐冇見大家，大家近來好嗎？好掛住大家。」隨後進入快問快答環節談及其近況，Minwoo提到近日最深刻印象嘅事係釣魚：「其實我釣魚唔叻，但好好運，喺《一日三餐》釣到大魚，嚟緊會播嘅節目中都有釣到。依家有啲釣魚中毒，想喺香港釣魚。」

提到鍾意嘅香港電影，Minwoo喺《英雄本色》及《天若有情》中揀咗《英雄本色》：「呢兩齣電影都係學生時期成日睇，睇咗10次以上，有好多回憶，以前會咬牙籤扮周潤發。」Minwoo又話香港夜景好靚，想喺高處睇，不過Minwoo又賣口乖話「現場粉絲靚過夜景」，粉絲立即尖叫。對於未來計劃，Minwoo笑言想同隊友Junjin睇新年日出，又話如果揀同隊友Andy睇Junjin會嬲豬，相當搞笑。被問到想同咩女團合作 Minwoo先指想同元祖女團S.E.S合作，又指自己唔多熟啲女團，隨後先數出識TWICE及BLACK PINK。

於另一與粉絲玩心有靈犀嘅環節中，Minwoo提到聖誕可能會着嘅打扮，粉絲大叫《冰雪奇緣》嘅「Elsa」，不過Minwoo表示：「之前扮過神奇女俠，所以唔想再着女裝。」Minwoo又指未食過碗仔翅、雞蛋仔、魚旦、臭豆腐等香港街頭小食，主持人就叫佢試臭豆腐，Minwoo指有聞過臭豆腐嘅味道，但唔鍾意。

Minwoo又喺現場玩心理測驗，即席晒畫功畫咗兩幅畫，隨後晚上開騷嘅申彗星就擔任嘉賓出場，同Minwoo喺台上玩遊戲打保齡球，其中一局Minwoo打到全中勁開心，粉絲亦喺台下歡呼，最終Minwoo勝出比賽，申彗星被罰跳性感舞蹈，但佢非常怕醜 只係象徵式郁咗幾下。之後Minwoo連唱多首人氣歌曲《Just one night》、《Kiss it away》、《M Style》等，氣氛高漲。

更多韓流，喺晒《娛果》
http://fb.com/appledailyent