石修、劉永和三位星二代陳宇琛、徐偉棟、曾國祥等人今日到元朗為網劇《我的老千生涯》進行網劇開鏡，呢套戲星二代同自己父親有對手戲，陳宇琛同石修喺戲中對立，石修派人綁阿仔，問佢哋對打會唔會落唔到手，陳宇琛話：「呢套戲冇，但之前拍港視劇試過對打，最初都諗會唔會尷尬，同埋怕打親佢，但真係做嘢時冇諗咁多，仲打得好爽。」

至於徐偉楝父親徐少強會客串演出，但兩父子唔會出手。至於細個有冇俾父親打過，佢話：「冇，佢唔鍾意打人，可能怕一掌打死我。」

另外，曾國祥拍緊《賭城風雲2》，呢排都係拍大場口有爆破開槍戲，佢話：「頭先樂仔（余文樂）太近爆炸位，所以彈傷腳，幸好冇乜事。之前我都試過被碎石彈到面。有時放工見到女友，都見到我石頭有沙石。」問到女友可有安慰，佢話：「冇，反而佢好有興趣拍呢類型戲，因未試過開槍戲。」而佢仲話呢套戲到時父親曾志偉會客串，佢話：「到時佢同叻哥、晶哥（王晶）同發哥（周潤發）有一幕麻雀局，好想睇，期望睇番《精裝追女仔》一班人一齊。」

而劉永近廿年沒拍港劇，劇中做正派，更謂很久沒拍時裝劇，至於內地工作酬勞可更好？佢笑話：「可以食吓粥咁啦。」