不問蒼生問鬼神，香港人要靠車公指點迷津，特首煲呔原來都拜神。佢係天主教徒，但可能同陳主教冇乜偈傾，去年底突然秘密到訪大嶼山寶蓮寺，搵住持方丈告解，大嘆：「我好慘呀！」
寶蓮寺住持釋智慧年前中風，噚日篤住枴杖參加佛教聯合會團拜活動，其間智慧大師爆料，指煲呔喺舊年年尾一個禮拜日，同埋老婆、親戚去寶蓮寺，大師透露，煲呔一見到佢就好慘情咁話：「我好慘呀！」點解煲呔入到大雄寶殿向住神明訴苦呢？八方翻查資料，去年12月裁員減薪消息不絕，加上泰國包機事件，令煲呔民望勁插至50.2分，係97年以來歷史最低位，難怪要求神打救。

大師勸特首睇開啲

智慧大師同八方講，認識煲呔30幾年，聽得出煲呔言詞間顯得工作好辛苦，尤其係去年下半年，「佢（煲呔）覺得𠵱家啲人，都冇以前啲人對佢講嘢咁清楚。」對於煲呔嗌慘，大師勸佢睇開啲，「我話如果佢慘，我哋咪仲更加慘！」
煲呔民望跌，係因為市民不滿施政，如果佢做好啲，例如早啲派包機，民望回升就唔慘啦，大師果然係得道高僧，呢兩句佛偈，只怕煲呔慧根不足，領悟唔到當中深意，釋智慧亦話有啲嘢不能言傳，能否參透因果要靠自己，「佢係特首嚟㗎嘛。」今年係佛誕列為公眾假期10周年，釋智慧話已邀請煲呔擔任紀念儀式主禮嘉賓，但特首辦未回覆是否接受邀請。
經濟唔好，多咗善信求神問卜，釋智慧都話寶蓮寺今年香火特別鼎盛，由年初一起，每日都有過萬人入廟，至於大家係咪臨急抱佛腳，大師話：「呢個我唔話畀你哋聽。」發叔為香港求到下籤，釋智慧認為唔使太擔心，又話其實唔使去求籤，有時間可以去寶蓮寺拜佛，處世之道最緊要係與人為善，「你對我好，我對你好，每個官員都應該做好啲，政府對人民做好啲，咁就已經化解晒。」不過佢話特區官員呢方面衰過港英，「港英時個個都對我哋好好，𠵱家佢哋只對自己好，冇對人好，咁好成問題。」唔通又係「家鬼」作怪？大師話出家人不打誑語，「呢啲嘢我唔講嘞。」

mailto:[email protected]