前港督肥彭本周一訪港後，聽晚就會離開香港，佢今日接蘋果專訪時，就關心紙媒發展，話現時英國世界各地都越來越少人睇紙媒，佢屋企的小朋友大部分都只用手機睇網上資訊，但佢仍然鍾情紙媒，每日堅持睇3份報紙，包括《金融時報》(The Financial Times)、《泰晤士報》（The Times）同《衛報》（The Guardian），網上則會睇《經濟學人》（The Economist）同《紐約書評》（The New York Review of Books）等，但就慨嘆現時要搵到佢想睇的香港新聞唔容易。

肥彭本新書《First Confession》6月已出版，點解佢9月先嚟香港? 肥彭解釋，原本計劃6月或7月已來港，可惜因為要喺英國出席好多活動，身兼牛津大學校長的佢亦校務繁忙，所以最近先來港宣傳新書，順便同牛津大學舊生聚舊。

肥彭又預告，自己下周就會去愛爾蘭同美國，10月去日本，12月就去澳洲，形容自己呢排都「在飛機上生活」。肥彭又搞笑話，從無想過自己會被拒入境香港，因為佢每次訪港，香港人都對佢好友善，林鄭亦有話歡迎佢來港。雖然訪港行程緊密，但肥彭話已經食過兩次蛋撻，仲搞笑話:「唔好話畀我老婆知啊!」