散戶威力果然非同凡響，一心諗住等回先買，結果個市就挾到爆廠，連尾燈都唔畀睇。恒指距離金融海嘯後高位二萬五唔夠400點，呢個moment冇貨在手嘅散戶，究竟應該點做？根據以往資金狂潮市，板塊一定係輪流炒，資源股之後，噚日就輪到本地地產股，睇返唔少內房股如萬科（2202）及保利置業（119）等，大棍崛起後正在造旗，趁未翻叮買定有着數，起碼少咗高追嘅心理包袱。

Mega Expo市值僅2億

細價股炒風熾熱，月初推介嘅冷門股恒都（725），噚日一度炒高五成，最新市值仲未夠3億銀，有跟進嘅戰友可斬邊留邊，用NAV價計，潛在升幅達八成！
另一冷門股Mega Expo（1360），噚日搶高6%，成交量大增兩倍，絕對有力做恒都翻版。話Mega Expo係滄海遺珠絕不過份，講業績，公司主力舉辦展覽會及相關配套服務，截至去年底止中期盈利4,378萬銀，雖然按年倒退28%，但年度化市盈率只得1.9倍！同業筆克遠東（752）現價市盈率10.3倍，Mega Expo大幅折讓八成，平得過份。講概念，公司最新市值僅2.1億銀，當中六成仲係要現金，大股東持貨七成，稱之為殼股狀元絕不為過。殼股熱潮越吹越勁，獲搵殼專家垂青相信只係時間問題，千里馬一旦遇上伯樂，點石成金威力不可小覷。
睇圖表，Mega Expo日線圖行緊靚圓底，一旦升穿頸線，將會開展新一輪升浪，從任何角度出發，都值得真金白銀支持。

唐牛
https://www.facebook.com/tongcow88