英國駐港總領事易角,駐北京大使館公使柏聖文(StephenEdwardBradley),將會接替行將退休嘅何進爵士,年底到任。八方聽到柏聖文個名,馬上諗起呢位打煲呔嘅靚仔外交官,當年佢老哥借調到港英政府做副政治顧問,剛好撞正八九民運同中英爭拗,認真唔得閒。
柏仔今次重返香江,聽講煲呔曾最高興。佢打第一個煲呔,都係同柏仔有關。
話說煲呔曾當年做緊官仔,佢同由英國嚟嘅柏聖文打賭,如果佢夠膽帶柏仔個煲呔出鏡,柏仔就要送咗個煲呔畀佢。結果,曾蔭權梗係贏咗,自此之後,佢就愛上結煲呔,覺得好好睇。
柏聖文威水史
柏仔由八八年起做港府嘅副政治顧問,服侍過衞奕信同肥彭,做到九三年,前後五年。之後英國佬重特許佢停薪休假,留喺香港嘅LloydGeorgeInvestmentManagement公司做副總裁,對香港情況可謂非常熟悉。喺香港民怨四起,大罵英國人唔夠義氣之際,柏仔應該可以有多啲作為。
講起柏仔做過嗰間LloydGeorge公司,好有來頭,呢間基金公司老闆叫羅祖儒(LloydGeorge),佢阿爺叫做DavidLloydGeorge(勞合.喬治),一九一六至二二年間做過英國首相,當年不但反對大英帝國擴張,重推行養老金及國民保險制度,係改革先鋒,有支歌仔《LloydGeorgeKnewMyFather》,家傳戶曉。
傳真︰2623-9278
電郵︰[email protected]