一票難求嘅《鄭秀文Touch Mi 2世界巡迴演唱會2016香港站》今晚正式喺紅館開騷，雖然Sammi喺開騷喉嚨發炎，搞到聲沙沙，不過佢仍然好努力為演唱會做準備，今日成個下晝都喺紅館綵排，其間見到劉德華現身紅館，逗留咗差唔多一個鐘先離開，唔知佢係咪擔任今晚嘅嘉賓？

之後許志安亦有現身紅館，相信佢係喺後台同老婆Sammi打氣，唔少fans大叫安仔個名，佢都好好笑容咁邊行邊揮手。大約到咗傍晚6點，Sammi同埋啲工作人員喺紅館後台拜神，祈求演出順利，當工作人員化寶嘅時候，Sammi企喺傍邊祈禱。

但係唔知現場太多香火，見到Sammi有啲咳，不過心情勁靚嘅Sammi，向現場嘅fans揮手同躹躬，有fans問佢把聲好啲未？佢只係攤開做手勢，示意自己可以！但係佢喺fb拍條短片，話自己把聲好咗啲，聽(今)日正式開騷，無論點都會加油，有幾多，做幾多！