「扭得好~踢得鬼馬~可稱霸只有他~」因為仿似日本漫畫《足球小將》主角由高中全國大賽到歐洲球壇踢出彩虹而被視為真人版足球小將嘅柴崎岳，年初加盟西乙特內里費後，經過幾個月適應後終於綻放光芒，上月底仲取得西乙處子入球！佢嘅表現亦獲得特內里費球迷認同，周五獲頒球會5月最佳球員獎項！

不過，呢位25歲日本中場要一圓西甲夢就要加把勁，皆因特內里費喺升班附加賽準決賽首回合作客0:1輸畀卡迪斯，周日就會回師主場再戰次回合力爭出線，再同基達菲或侯爾斯卡嘅勝方爭奪最後一個升班席位，奸爸爹！