容祖兒去年九月宣布與拍拖兩年的圈外「隱形男友」分手後,至今未有新戀情,她形容自己愛情「乾塘」,祖兒說:「之前嗰段情過去咗,要搵新對象好難,做呢行嘅對方見到我都有少少驚,驚我忙啦,唔會有普通男仔想同你拍拖,二來拍拖又唔可以咁光明正大,要匿埋喺屋企,唔係正常嘅戀愛,所以人哋未必會選擇你。」
不想與圈中人拍拖
祖兒入行以來緋聞不多,她笑言可能被人斬斷了桃花樹,祖兒笑說:「係咪我唔靚呢?我都算係最dry(乾涸)女星,不過我又唔會亂畀訊號人哋,男仔傾多兩句,我會向後行,冇緋聞同自己幅牆都有關係。」
娛圈不乏俊男美女,可是祖兒揚言不會選擇與圈中人拍拖,因為男星實在令她欠缺安全感,祖兒說:「我唔會憧憬同圈內人拍拖,始終大家嘅圈子咁忙,圈內人會有太多引誘,我係一個需要安全感嘅女仔,唔想成日提心吊膽。我曾經問過高人,問可唔可以搵個好老公?高人話我咁黐筋嘅性格,要搵個低能嘅至得。其實我唔恨拍拖,我一個人都得,OK喎,我性格幾man㗎!霆鋒、馮德倫都唔當我係女仔嘅,感情嘅嘢,隨緣啦,我又唔恨。」