「入場費」最少3,000萬、最貴賣3億一個單位嘅「四季海上豪宅」(FourSeasonsOceanResidences)嚟香港賣「樓花」(或者叫船花啱啲),可見香港有錢佬眾,據八方所知,最少有兩個闊佬幾年前一擲千萬買個海上「柏文」,一個係環球速遞企業DHL前老闆鍾普洋,另一個據講係李超人左右手、港燈非執董麥理思。
「四季海上豪宅」要2010年先入伙,其實幾年前已經有一艘同類型海上超級豪宅賣出,據稱鍾普洋個單位大約1,200呎,當年價錢大約200萬美金。海上豪宅賣咁貴,艘船當然要幾豪有幾豪,管理費亦係天價,最少10萬蚊港幣一個月,非一般人可以負擔同想像。
樓,香港人鍾意愛嚟炒多過住,呢啲海上「柏文」有冇鑊氣呢?知行情者同八方講,幾年前一個200萬美金單位,𠵱家水漲船高升值至300萬美金,聽落好似有得炒,至於係咪值得投資,就唔到八方傷腦筋嘞。有人話幾千萬買個海上豪宅不如買艘船好過,至少可以自己話事,自由自在縱橫四海,睇過盤嘅人就話船上有個業主會,集體協商為期兩年航程,順路啱玩就跟大隊,唔合口味嘅可以上岸行開吓,悉隨尊便,事實上唔少業主真係長年坐船去到邊玩到邊,有個酋長更同六個妻妾長居海上,樂不思蜀。
買個豪宅唔用盡佢好唔抵喎,有錢人數口精梗係唔會蝕底,唔自住可以放租,據講每日租金按單位價值計算,若單位賣200萬美金,每晚租金大約200蚊美金,長期放租條數都幾襟計。呢啲非一般豪宅,買家非富則貴,用途亦非常之多,有人話最好金屋藏嬌,有美相伴遨遊四海仲唔係人生快事?擅長逆向思維嘅人反建議買嚟送畀老婆,將佢送出海50年不返,一班大婆喺公海歎世界,老公喺岸上做乜就冇人知喇。
所以八方喺度提醒各位大婆,如果個衰佬話送個海上豪宅畀你真係要諗過先,若然你費事眼寃寧願出海散心,八方唔會阻止你,話唔定有人將個「柏文」出租畀視TonyChan為偶像、略懂玄學嘅猛男,屆時喺船上都不愁芳心寂寞;另一商機無限嘅搵錢招數係舉辦垂釣團,唔係夜媽媽出海「chok」墨魚而係釣金龜,幾個姊妹夾份租間「柏文」分頭出擊,同咁多有錢人士共處一船,大把時間慢慢培養感情。