黃貫中將偕同黃家強於本月24日舉行一連三場紅館演唱會，雖然開騷在即，不過向來視女友朱茵大過天的阿Paul，幾忙都要享受拍拖樂。前晚他駕車載女友遊車河，豈料其三菱座駕唔爭氣，行經九龍城獅子石道時突然跪低，認真掃興。

現場見阿Paul對維修車輛似乎零認識，惟有電召救兵幫忙，不久男友人駕車到場搭過江龍試圖撻車，其間着短裙的朱茵一直留在冇冷氣的車廂內，托腮扁嘴等到吽。男友人搞足20分鐘座駕仍無起色，為免女友苦等選擇交友人收拾殘局，拖朱茵離開，冧得她笑不攏嘴。
接着Paul與女友拖手往附近的超級市場掃貨，兩人掃紅酒、啤酒、花生及薯片等飲品零食後，再手拖手漫步往女方的士他令道香閨。近日盛傳Paul搬去女友家中共賦同居，雖然他已否認，但前晚又打躉朱茵寓所。
Paul向來我行我素，日前他更公開發表棒棒堂專業咪嘴論，惹來棒棒堂fans在其網誌留言狂鬧，要他道歉，否則便會炸blog，昨日記者曾致電Paul，惟至截稿前未獲回覆。
採訪、攝影：黃文偉、李志明