當年今日
關於我們

【金宵大廈】張韋怡夫家係地王 紆尊降貴演鳳姐獲關注

蘋果日報 2019/09/17 20:00

娛樂金宵大廈張韋怡徐玟晴趙希洛娛樂

大台新劇《金宵大廈》昨晚首播,單單頭4分鐘已經唔想再睇落去!

唔係因為太垃圾,而係十足鬼片一樣太恐怖。頭4分鐘一句對白都無,單靠畫面及聲效營造出令觀眾心驚膽顫嘅氛圍,真係有種喺戲院睇鬼片想遮眼唔敢睇嘅衝動!以大台作品嚟講絕對「高汁」,所以網民都大讚:「好正!一啲都唔似睇緊TVB。」(似彈多過讚喎。)

大台劇通常有個通病,雷聲大雨點小,即開始係威係勢,但好快無以為繼。不過以首集而言,繼頭4分鐘夠恐怖外,之後亦都有吸引人嘅伏線出現,例如又演癲婆嘅趙希洛,斷估離唔開養鬼仔、嬰靈一類情節。另外,笑點都唔少,其中飾演鳳姐嘅張韋怡、徐玟晴最引人注意,特別係張韋怡,唔少觀眾都話:「呢個正,我啱。」「身材好得喎!」「外表keep得好又有人妻feel。」

梗係啦,現年35歲的張韋怡係真人妻,有埋小朋友㗎喇。佢2007年參加港姐競選入行,通常做大茄所以觀眾對佢印象唔深,但講到演妓女角色,佢經驗算得上豐富(《巴不得爸爸》、《蒲松齡》、《潛行狙擊》、《盛世仁傑》、《名媛望族》及《金宵大廈》),妓女以外仲會演啲伴酒、伴唱、二奶角色。

雖然一直做二打六,但張韋怡其實係名副其實的闊太,潘姓夫家做地皮生意係隱形地王,傳聞喺新界有三百幅地皮,而且家住九龍塘喇沙利道樓高十層未計天台同花園都已八千幾呎的別墅,更附設室內電梯方便上落。

另外,張韋怡本身經營鐘錶生意及公關公司,係個大老闆,所以朋友都好奇點解佢唔介意演啲低下角色,佢就解釋:「演咩角色其實無衝突,演員係我職業,我鍾意演戲,自己咩角色都想試,何況樣樣角色都做得好開心,老公知道我鍾意都好支持。」
empty
empty
empty
empty
empty
empty
9月2日起升級條件將更新 繼續每月撐壹仔 講真心話撐住我香港!
empty