《城市論壇》以維園阿伯聞名，近年有維園阿哥，更加聲色俱備滿城風雨，有阿伯、阿哥，最近，有埋阿「公」，第日認住呢個「公」，就搵到《城市論壇》。
港台推出「城市論壇流動版」（RTHKthumb）嘅iPhoneApp，免費，裝咗之後可以上網睇《城市論壇》直播，重有互動功能，可以一邊睇、一邊表態，邊個嘉賓言論啱聽，可以like，唔啱聽嘅，可以彈，又可以留言發表意見，亦有得節目重溫。
推出維園阿「公」，港台話希望《城市論壇》可以衝出電視框框，結合電視與社交媒體，預計「社交電視」會成為嶄新嘅觀看電視模式。