雷神返晒嚟！莫雷拉貴為三屆香港冠軍騎師，這晚（6日）在谷中贏到開巷，跑完頭兩場憑一對大熱1檔馬「銘記心中」及「勇闖者」起孖後，第三場三班1200米贏埋蘇偉賢馬房「夢幻仙子」，擸埋第二口孖寶，大演帽子戲法。「夢幻仙子」單Win及組合獨贏A3分別派82及26.5元。

五歲馬「夢幻仙子」質高體弱，過去曾患喘鳴症，上次11月8日谷草夜馬排位後因右前蹄受傷退出，今晚傷癒復出重配雷神，陣上從第5檔起步，沿途守第七位，直路抄出外叠望空逐步追上，成功趕過沿欄直上的1檔馬「好益善」先過終點，險勝短馬頭位，為馬主東方報業家族的馬廷雄打開今季勝門，亦成為雷神與蘇偉賢近一個月內首匹合作頭馬。

蘇偉賢表示「夢幻仙子」做完喉部手術後，其實健康很穩定，可惜多次遇不利形勢，例如排12檔，影響了爭勝。蘇偉賢又透露曾搵羅理雅騎，不過羅理雅一早答應騎「魅力知心」，繼而找布文騎，布文又有「紅運爵士」，巧合雷神今場沒有馬騎，輾轉才由他操刀，雷神亦發揮很好。

蘇偉賢又指「夢幻仙子」五檔好跑，早前蹄甲受傷，現已受控，希望馬兒保持進度，再爭取勝利。

有幸有不幸，潘頓今場騎「好益善」跑第二，是繼頭場策「贏馬神器」俾雷神的「銘記心中」臨尾追過只能做二奶後，第三場再次衰喺雷神手上屈居亞軍。

第三場三、四名分別為「魅力知心」及「叫關健康」，四重彩派一萬六千幾。