今期（18日）沙田編跑十場，兩泥八草地，草地用利放的C加三跑道，連日有雨，對兩條跑道都有影響。今次賽事潘頓及莫雷拉座騎實力相當強；而巫顯東升格減七磅，潘明輝是現役唯一的十磅仔好着數。蔡約翰要突破頭馬紀錄，鄭俊偉差兩Win便上岸，各自有奮鬥目標。

第九場二班草地1600米，「再開心」上季贏三Win，上仗回配最佳拍檔潘頓，當日賽事模式利擺前走，因應形勢，縱使「再開心」排不利之14檔，潘頓仍選擇搶前領放，最後負於「勝利導航」及「喜旺寶」得季軍，表現已唔曳。此匹五歲馬大熟當銳，跑法靈活多變，可放可留，季內只贏一仗成績唔理想，今勻負磅唔重，狀態水準穩定，忠心馬演出準繩，不失為穩膽之選。

同場「四季旺」近兩仗發揮未如理想，復課馬身喼得壯，快跳無唔妥，季內同程僅負於「佳龍駒」，賽績硬淨，今仗由莫雷拉執韁，抽一檔一定拼個明白。「綫路勇駒」近仗在長途賽演出一般，今次重新部署，操足出戰合適路程1600米，用潘明輝負超輕磅拖一票。「鈦金剛」今次休後復出，最近在1700米谷閘帶放勝出，出戰首本路程可出冷。「勝利導航」剛勝表現出色，復課體態飽滿勇況不減，只是演出頗反覆，故非重心捧場對象。其餘「人民武士」跑得太多了。「怪獸家長」狀態平穩可兼顧。