今季唔經唔覺踏入季尾，馬會已經密鑼緊鼓籌備緊下季嘅賽期。據聞馬會初步準備下季9月3號開鑼，下季開鑼日馬，揀跑禮拜六，係為咗遷就9月4號嘅立法會選舉，馬會過去都會盡量避免跑馬同選舉撞期。由於七月中係法例規定嘅停火死線，下季就暫定7月9號禮拜日煞科。
馬會正向政府申請下季加多五次夜馬同八次越洋轉播賽事日，換句話講，下季賽期會排得非常密，名副其實馬不停蹄。
若然計埋越洋轉播賽期，又要避開某啲唔適宜跑馬嘅特別節日，其實編排賽期嘅彈性唔大，雖則下季加唔加得成賽日仲係未知數，但點都要多一手準備，以備通過都唔會手忙腳亂，提早度定整季賽期非常合理。
講起加賽日，最終都要等政府扑槌。馬會雖然同時提出加本地賽同越洋賽日，睇落都幾大貪，其實呢個只係最理想嘅方案，越洋賽算係搭單加埋落去，就算政府只同意下季加多五次夜馬，最終打個折扣，唔批准加多八次越洋賽事轉播日，馬會都絕對收貨。其實呢條數好易計，越洋賽事投注額始終有限，同本地賽日冇得比，跑一次夜馬隨時已經過十億投注額。
其實香港跑一次馬並非話跑就跑咁簡單，仲要好多唔同部門安排配套，馬會提加賽日當然盡量嗌價，但係都應該有讓步空間，若大家遷就吓，平衡到唔同人嘅訴求，咪皆大歡喜囉。

阿Joe