曼聯傳奇領隊費格遜特別緊張雙紅會，今場波曼聯禮拜五照舊去曼徹斯特市中心嘅Lowry Hotel集宿，老費就特登去探班，睇嚟都係鼓勵下班球員，今場要打低宿敵！而且，據報摩連奴亦都同費格遜有過會面，唔知老費會唔會俾啲貼士佢喇！而今場波費格遜亦都當然大有機會會入場睇啦。

另外，英格蘭主帥修夫基今場都會入場，傳媒預計佢係主力睇利物浦中場阿歷士張伯倫，事關過埋今輪英超，英軍就會公佈3月友賽名單，亦都係世盃點兵前嘅最後一期友賽，所以上年11月落選嘅張伯倫，如果今次都冇份就好大機會落選世盃大軍，呢份前阿仙奴翼鋒，近期喺紅軍踢到佢一直想踢嘅中場中，仲越踢越好，今場亦都係佢嘅關鍵戰！

-------------------
永不獨行！利物浦 FC 當季球星降臨《BFB》！立即帶領紅軍，創造新輝煌！ http://bit.ly/2oQObi1