王賢誌、陳法蓉、關禮傑及白健恩等今日到荔枝角，出席《歡樂滿東華·觀瀾湖高爾夫球慈善大賽》記者會。王賢誌明年將會擔任東華主席，佢話有見近年東華籌款做得麻麻，所以佢希望明年會搞得有聲有色，對於今屆港姐劣評如潮，王賢誌話：「唔關佳麗事，係個機制唔係好明，選得出季軍都知道幾多分，點解得冠亞兩個仲要選，同埋分數永遠都係打和，件事好似擺咗嘟姐(鄭裕玲)上枱，睇到搲頭。俾我冇選擇之下都係揀8號(伍樂怡)，1號(何依婷)唔係我心水，8號亦唔sharp。」王賢誌亦批評tvb過份硬銷自家app，佢話：「使唔使咁多，仲多過香港小姐，唔好講話嗰十間房同表演食蛋糕，今屆45週年都唔細，希望嘟姐冇唔開心。」

港姐出身嘅陳法蓉就話，覺得網上表演食蛋糕係幾奇怪，而8號都係佢嘅心水冠軍，陳法蓉話：「我喺網上post留言，有人出言攻擊佳麗，我都刪咗啲post，佢哋都係小朋友嚟啫。」