【國金89樓】警察早已滲透金融業（程總裁）
蘋果日報 2020/08/25 17:32
金管局和警務處下星期四（27日）舉行國安法講座。
程總裁今次唔係想分享一個觀點，而係一個事實——警察喺銀行業、保險業無處不在。
自從金融海嘯後，全球監管機構對金融犯罪零容忍，雞毛蒜皮都抽秤，處以天價罰款，所有經歷過嘅從業員並不陌生。亦因如此，金融機構衍生大量反金融罪行部、合規部職位。
究竟哪來咁多人才去調查金融罪行？冇理由搵生意上的「衝衝子」Banker，點睇佢哋似有誘因踩界多過撲滅罪行；律師同會計師當然OK，但最理想之選就係警察。
金管局、證監會等對於撲滅金融罪行當然有Role，但若牽涉刑事，警務處有份的聯合財富情報組（JFIU）或商業罪案調查科（CCB）等亦可作出調查，權力甚大，沾手不少重大案件。
不少上述JFIU及CCB人員脫離警察體系後，都加入銀行反金融罪行部，例如美心太子女伍淑清旗下天星銀行就係好例子，Financial Crime Compliance Controls主管正係早年JFIU阿頭。
當然，唔止天星，根據公開資料，幾乎所有銀行合規部都搵到警察蹤影，滙豐（005）、中銀香港（2388）、保險公司、證券行都有，高薪厚職，而且有榮無辱，相信係警察今輪跳槽避風塘（只限高學歷）。
不過本總裁想講嘅係，金管局同警務處下星期四（27日）舉行講座，聲稱係In response to銀行業對於國安法下合規工作及商業運行潛在影響的迷思，就令我有啲疑惑。
金融機構已經有一班前警察高層處理In-house嘅Financial Crime，對於防範「因國安法而衍生的金融罪行執法行動」，已經有一套說法——嚴厲打擊為先，公平待客次之。若果警務處下周講座就是對這些說法予以肯定，很多民主派人士或因涉嫌觸犯國安法未能接觸銀行服務，金管局可以將不能公平待客的責任推卸給警察。
本欄上周憂慮證監會設立國安部，為調查壹傳媒（282）採取特別執法行動，但最令人擔心的是連金管局亦有同樣傾向。套用網友一句說話作結：「只要用心，人人都係國安部」，希望不會成真。
程總裁
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！