愛美係女人天性，性感女神溫碧霞多年嚟都保持到性感度，原來佢一向都好少特別去護膚，直至最近以七位數字簽約，成為護膚代言人，嘗試過保濕同激光護膚後，佢就大讚特讚，佢話：「收緊保濕療程好好，平時我都唔做護膚，因為多謝父母遺傳好嘅皮膚畀我。」

問到老公有乜反應？佢話：「佢話唔使啦，我已經好靚，不過我都覺得女人係要保養下，外在同內在都重要，我有保持做運動，近年愛上瑜伽，令人健康又精神咗。」療程需要針導入，佢坦言起初都好驚，點知造完機後，完全都唔痛。

嚟緊佢會接拍內地電影《70後80後90後》，戲中會演同另一半同甘共苦嘅夫妻，當彼此事業起飛時，就發現感情轉淡，最後離婚獨自努力追求夢想，佢話：「戲中嘅妝都唔使點大轉變，因為o依家女性都追貼潮流，樣貌唔會太大改變。」

下月尾佢嘅製作室，會開拍第一部電影叫《愛在深秋》，佢話詳情稍後公布，但會起用新演員，務求拍出真實感。