面係人哋畀，架呢，就要問港專。港專馬鞍山本科校園今日開幕，邀請署任行政長官林鄭月娥同中聯辦主任張曉明做主禮嘉賓，本應開開心心，但港專嚴陣以待，封校唔畀學生返學，仲要困住記者喺密室，搞到一眾行家嬲爆。事緣港專發出採訪通知寫明11時開始，有高官到場，八方同行家梗係早到，點知12時先可以採訪，呢啲事時有發生，但行家想參觀新校舍，港專公關大為緊張，呢度唔行得，嗰度唔去得，要喺指定位置「罰企」。

典禮後校長陳卓禧忙住招呼賓客，唔得閒回應傳媒提問。公關要記者去個密室乾等，唔可以周圍走，冇得參觀，好似怕咗記者接觸學生。原本校長1點半見傳媒，等極都唔見人，有行家忍唔住發炮：「校長唔守時點教學生？」公關仲竟然話：「唔知校長去咗邊，搵唔到佢」。催了又等，等了又催，校長終於肯到場。其實八方同行家都係想了解新學舍啫，唔通有乜國家機密唔畀得人知，要班公關禁絕採訪？