韓國組合JYJ成員朴有天嘅新劇《3days》，噚晚緊接《來自星星的你》嘅檔期首播，外界對《3days》寄予厚望，當中內地嘅優酷網同土豆網，更重槌出擊，以624萬港元嘅高價，買入中國播映權，刷新韓劇賣到內地嘅新紀錄。

《星星》勁hit，當中以內地粉絲最瘋狂，令韓劇賣埠價水漲船高。《星星》播完後，外界都睇好接棒嘅懸疑劇《3days》，可延續熱潮，一嚟男主角朴有天本身已經有大班粉絲，二嚟SBS電視台嘅出品，都有不敗紀錄，之前《聽見你的聲音》、《主君的太陽》、《繼承者們》，到最近嘅《星星》都係收視冠軍。

以往出口到中國嘅韓劇，每集售價都唔超過78,000港元，但《3days》就以每集近5倍嘅價錢售出，以16集計算嘅話，即優酷網同土豆網為搶得此劇喺內地同步播映權，落足本斥資624萬港元，仲勁過《星星》，創下內地版權費新高。