鄺美雲（Cally）喺日前平安夜渡過55歲生日，今日Cally就去到商台為新碟《C again》宣傳，獲主持人送上蛋糕補祝，Cally話連日嚟收到好多個蛋糕：「好開心，希望身體健康同平安，而要做嘅工作亦能夠順利。」想唔想搵個伴？佢話：「無諗，其實都好忙，兩隻狗狗Euro同Bank一路伴住我，特別係Cash離開後，Euro好似覺得要替代爸爸角色咁，特別黐身跟出跟入，有時都會帶佢一齊工作。」

講起新專輯，Cally話今次係事隔20年再灌錄，監製趙增熹想Cally呈現出唔同嘅感覺，所以過程需要時間磨合，好彩出嚟效果理想。

講到早前Cally獲選為港區人大代表，佢話：「選舉完好開心係個新開始，好多使命陸續要做好，亦開始問緊朋友意見，希望將來做到香港同大陸之間嘅溝通橋樑。」Cally又話自己會著重教育同慈善議題，至於政府計劃重啟「23條立法」，或者會引起社會反應，佢話：「順其自然，23條立法係國家憲法，我相信特區政府有能力處理。」

更多娛聞，喺晒《娛果》
http://fb.com/appledailyent