日本樂壇天后安室奈美惠嘅私底下十分低調，不過坊間對佢嘅感情生活就相當關心。安室近年同已婚音樂上嘅拍檔西茂弘出雙入對，年前來港宣傳及開騷都得呢位知年逾半百知己陪伴左右。

今日出版嘅日本雜誌《Friday》，拍得安室同西茂弘每星期至少約會三次，除撐枱腳之外，安室連到銀行自動櫃員機都要由西茂弘傍住，足見兩人感情並不簡單。日前，安室偕西茂弘乘黑色七人車到澀谷鬧市，兩人食完壽司後由司機接送到安室與西茂弘同住嘅高級住宅大廈，抵達後只得安室落車，西茂弘就乘住七人車截返澀谷，經在書店逗留一回才返回寓所。原來安室為同西茂弘可以有個照應，由前經理人安排下遷進西茂弘同太太所住嘅同一棟大廈。

安室從上年8月開始展開巡迴演唱會，享受完新年假期，安室後日就會到福岡繼續開騷，唱至3月底共開騷88場。適逢安室就讀高中嘅乖仔溫大會喺3月畢業，行內人傳出安室屆時將有重要消息宣佈，有關再婚、暫別歌壇及引退說法簡直眾說紛紜。安室慘被蒙上「小三」罪名，西茂弘終罕有地接受《Friday》訪問，佢形容同安室之關係僅限於工作夥伴，解釋經常食飯只係因為工作需要，每次食飯嘅話題都係談工作，自言老婆都知道佢約安室見面，當談到安室介入婚姻之報道，西茂弘就咁講：「大家不要再戴有色眼鏡來看，我對安室以外的歌手都一視同人，目前安室巡唱才經常一起。如果再把我借題發揮，恐怕她會嫁不出了！」其實早前有指安室花2億日圓（約1,320萬港元）喺京都購入新居，懷疑佢已秘密覓得第二春準備再婚。