張智霖（Chilam）今日喺金鐘出席英國休閒男裝品牌Kent & Curwen全新概念店開幕，佢話試過喺踢波同新年時，都試過同囝囝魔童着父子裝，但就話如果一家三口着家庭裝，佢笑指會有啲尷尬。

講起家庭，梗係要問吓Chilam個老友、今年成家立室嘅郭富城啦！問到城城係咪返咗香港，Chilam話唔知，因為各有各忙，再提到日前有傳方媛為城城生咗個女（新聞連結： http://bit.ly/2eEKqrk ），問Chilam買咗BB女衫未？佢即刻笑笑口扯開話題：「我唔知你講咩喎，問番小美好啲，呢件衫好熱呀！」問佢最近有冇去醫院探BB？Chilam話：「我近排拍戲，日日忙開工。」講到好朋友做咗爸爸，會唔會戥佢哋開心？Chilam話：「當然，我身邊好多朋友近排都做咗爸爸（近排？係咪9月1號？）好多朋友，所以好多朋友，搞到我好亂呀！」

好喇，唔講人哋老婆，咁就講番Chilam老婆袁詠儀（靚靚）啦：講到靚靚前日46歲生日，Chilam話自幾個月前已經同劇組請假同老婆慶祝生日，問佢送咩禮物？Chilam話：「年中送咗對耳環畀佢，已經當係生日禮物，不過佢都冇要求要咩，我覺得佢真係長大咗。佢就送咗隻松鼠狗畀我，但係令到屋企本身隻狗情緒好低落。」

提到靚靚指Chilam同朋友出去玩嘅理由好「廢」，Chilam笑指：「我哋有兩個理由『終極豪情之夜』同『凱旋歸來』，朋友可能出埠一日，但都要歡迎佢返嚟，所以並唔係佢口中咁廢，我哋呢啲真男人，玩得又做得。」